Mataræði og næring
Mataræði og næring
Öllum er mikilvægt að tryggja að líkaminn fái þau næringarefni sem hann þarfnast. Að borða hollan mat, hreyfa sig og halda sér í réttri líkamsþyngd gerir líkamann sterkan og stuðlar að góðri heilsu. Hafir þú greinst með brjóstakrabbamein eða líkur á að þú fáir það eru yfir meðallagi vegna einhverra áhættuþátta, er einkar mikilvægt fyrir þig að borða rétt. Í þessum hluta verður hægt að lesa um mataræði, hvernig fæða getur stuðlað að því að draga úr líkum á að þú fáir brjóstakrabbamein eða það taki sig upp á ný, hvað og hvernig sé rétt að borða, bæði meðan á meðferð stendur og eins þegar hún er af staðin.
Hvað þýðir að borða rétt?
Að borða rétt þýðir að neyta fjölbreyttrar fæðu sem veitir þau næringarefni sem líkaminn þarfnast til að halda heilsu. Hér má átta sig á hvernig á að setja fæðuna rétt saman og ákveða skammta.
Mataræði og brjóstakrabbamein
Nýlegar rannsóknir benda til að hreyfing, rétt mataræði og hæfileg líkamsþyngd geti bæði dregið úr líkum á að fá brjóstakrabbamein og hættu á að sjúkdómurinn taki sig upp. Hér má lesa um þá fæðu sem útlærðir fæðuráðgjafar og næringarfræðingar mæla með.
Mataræði meðan á meðferð stendur og að henni lokinni
Sértu að jafna þig eftir skurðaðgerð, ert í meðferð með krabbameinslyfjum, geislameðferð eða einhverri annarri meðferð við brjóstakrabbameini, er markmiðið fyrst og fremst að losna við krabbameinið. Að nærast rétt og sjá til þess að líkaminn fái öll þau næringarefni sem hann þarfnast hjálpar þér að halda kröftum á meðan á baráttunni stendur. Hér má lesa um hvaða mataræði stuðlar að því að halda líkamsþyngd í skefjum, draga úr þreytu, byggja upp orku og fá nægan vökva.
Fæðubótarefni
Margar konur með brjóstakrabbamein taka inn alls kyns fæðubótarefni eins og vítamin, steinefni og jurtalyf með ýmsum eiginleikum og vonast til að styrkjast af því og geta unnið bug á krabbameininu. Hér má lesa tillögur um notkun fæðubótarefna.
Matvælaframleiðsla og öryggi
Í landbúnaði og matvælaframleiðslu víða um heim tíðkast aðferðir sem geta haft áhrif á heilsuna meðan á krabbameinsmeðferð stendur og eftir að henni lýkur. Hér má lesa ýmislegt í sambandi við matvælaframleiðslu og fá ábendingar um hvernig hægt er að hafa fæðu eins heilsusamlega og skaðlausa og kostur er.
Sérfræðingar í Mataræði og næringu eru:
Cyndi Thomson, Ph.D., R.D., aðstoðarprófessor í næringarfræði við University of Arizona, með læknisfræði og lýðheilsu sem aðalviðfangsefni. Hún er löggitur næringarfræðingur með yfir 15 ára reynslu í heilsugæslu og klíniskri næringarfræði. Dr. Thomson er einnig yfirmaður rannsókna við University of Arizona College of Public Health og hefur hlotið ýmsa styrki til að kynna sér samband mataræðis og krabbameins. Hún er meðlimur í ráðgefandi læknaráði breastcancer.org, en þar eiga sæti yfir 60 læknar og sérfræðingar á sviðum sem tengjast brjóstakrabbameini.
Diana Grant Dyer, M.S., R.D., löggiltur fæðuráðgjafi með 20 ára starfsreynslu. Hún hefur sérhæft sig í næringu alvarlega sjúkra. Hún er höfundur bókarinnar Krabbameinssaga fæðuráðgjafa sem á ensku heitir A Dietitian's Cancer Story: Information & Inspiration for Recovery & Healing from a 3-time Cancer Survivor (Swan Press, 2002). Diana Grant Dyer hefur sérstakan áhuga á því hvernig mataræði og næring getur átt þátt í að minnka líkur á krabbameini og auka líkur á bata.
*Efnið í Mataræði og næring las Þuríður heitin Hermannsdóttir yfir. Hún var m.a. brautryðjandi í makróbíótísku fæði, fæðuráðgjafi og hómópati. Blessuð sé ævinlega minning hennar.
Næsta síða: Hvað þýðir að borða rétt?
Síðast uppfært í september 2010