Bólga í slímhúð

Sum krabbameinslyf (svo sem 5-fluorouracil og xeloda) geta framkallað slímhúðarbólgu sem beina afleiðingu lyfjameðferðar. Slímhúðarbólga lýsir sér í því að sár koma á slímhúð í munnholi, hálsi, endaþarmi og leggöngum og hún verður rauð og þrútin.

Slímhúðarbólga í munni eða hálsi kallar fram tilfinningu þess að vera með kökk í hálsinum og finnast sárt að kyngja. Slímhúðarbólga í leggöngum veldur sársauka, útferð og stundum kláða.

Slímhúðarbólga getur líka stafað af sveppasýkingu eða óhjákvæmilegri geislun á vélindanu (rörinu sem liggur frá munni ofan í maga). Sveppasýking stafar af því að ónæmiskerfið er veiklað eða bælt meðan á lyfjameðferð stendur eða þú tekur inn stera eða sýklalyf. Svona sveppasýking framkallar hvíta skán í munnholinu (minnir svolítið á skyr eða kotasælu) og útferð úr leggöngum.

Áhrifaríkasta aðferðin til að bæta ástandið er að breyta mataræðinu, nota lyf og heilbrigða skynsemi.

Eftirfarandi ráð geta auðveldað þér að takast á við verki sem stafa af slímhúðarbólgu:

  • Best er að forðast allan heitan mat, mikið kryddaðan mat og mat með hátt sýrustig (tómatsósu, appelsínusafa, greipaldinsafa) og láta kaffi eiga sig.

  • Þægilegast er að neyta kaldrar mjólkurvöru.

  • Prófaðu að fá þér kaldan sýrðan rjóma fyrir máltíð til að þekja munnholið og fæðugöngin og draga þannig úr óþægindum. Finnist þér sýrður rjómi vondur, geturðu bætt í hann vanilludropum eða ávaxtaþykkni.

  • Þekjumyndandi lyf eins og munnskol með lidocaine geta komið að gagni.

  • Ekki taka inn stórar töflur. Myldu þær og blandaðu saman við eplamauk áður en þú kyngir.

  • Við þurrk í leggöngum skaltu nota sleipiefni.

Sveppasýkingu í munni má meðhöndla með sveppaeyðandi lyfjum eins og fluconazole (tegundarheiti: Diflucan), nystatin (tegundarheiti: Mucostatin) eða ketoconazole (tengundarheiti: Nizoral).

Sveppasýking í leggöngum gæti látið undan síga með hefðbundnum lyfjum (t.d. Terazolkremi sem er sett í leggöngin eða Diflucan) eða hreinni jógurt með lifandi sýrusæknum gerlum sem sett er upp í leggöngin. Nota má kalkúna- eða rjómasprautu til að koma jógúrtinni upp í leggöngin (má taka framan af stútnum til að gera opið stærra) eða einfaldlega nota fingur eða skeið.

Að gera leggöngin súrari með þunnri vatns- og ediksblöndu er líka einfalt, ódýrt og áhrifaríkt lyf við sveppasýkingu í leggöngum.

*Málsgrein með stjörnu er innskot þýðanda.

ÞB