Endurkoma brjóstakrabbameins á sama svæði
Endurkoma brjóstakrabbameins á sama svæði
Ummæli læknis:
"Flestar konur vita þegar sjúkdómurinn hefur tekið sig upp, einkum þegar um fjarmeinvörp er að ræða. Ég get talið þau skipti á fingrum annarrar handar þegar ég hef uppgötvað að krabbamein hafi tekið sig upp sem fjarmeinvörp án þess að konan vissi það. Líði þér vel þegar þú heimsækir lækninn þinn er afar ólíklegt að þú sért með fjarmeinvörp. Það lýsir sér öðru vísi en þegar krabbamein tekur sig upp á sama stað. Þá getur færni og reynsla læknisins orðið til þess að krabbamein uppgötvast sem þú hafðir engan grun um."
—Jennifer Griggs, M.D.
Þegar þú fórst í skurðaðgerðina kann læknirinn að hafa fjarlægt eitla í holhöndinni næst brjóstinu og í þeim fundist krabbamein. Brjóstakrabbamein getur tekið sig upp annars staðar sem telst vera sama svæði:
-
Í einhverjum af eitlunum sem voru skildir eftir í holhöndinni,
-
í eitlum rétt fyrir neðan viðbein,
-
í eitlum neðst á hálsinum (ofan viðbeins),
-
í eitlum undir bringunni, meðfram bringubeininu (innri brjósteitlar).
Hjá um það bil 40% kvenna sem krabbamein tekur sig upp hjá, hefur það dreift sér í eitla. Verðir þú eða læknir þinn vör við harða, kúlulaga hnúta einhvers staðar nálægt brjóstinu þar sem krabbameinið greindist á sínum tíma, gæti það hafa tekið sig upp á ný á sama svæði. Stundum finnast stækkaðir eitlar af þessu tagi á brjóstamynd við venjulega hópleit.
Ekki er algengt að krabbamein taki sig einungis upp í eitlum í holhönd. Hjá færri en fimm af hverjum hundrað konum gerist það þannig. Í staðinn greinist krabbameinið aftur bæði í holhandareitlum og inni í brjóstinu eða í vefjum brjóstkassans.
Að öllum líkindum mun læknir þinn fá sýni úr stækkuðum eitli til að athuga hvort krabbameinið hefur tekið sig upp aftur. Stækkaður eitill þarf ekki að vera merki um krabbamein.
Næsta síða: Fjarmeinvörp brjóstakrabbameins
Síðast uppfært í júlí 2008