Krabbameinsleit og rannsóknir
Krabbameinsleit og rannsóknir
Ummæli einstaklings
„Ég átti ekki von á öðru en allt væri í lagi. Ég var bara í mínu venjulega eftirliti á leitarstöð þangað sem ég fór í brjóstamyndatöku. Svo varð einhver áhyggjufullur yfir einhverju, því það voru teknar fleiri myndir en venjulega. Svo átti að taka sýni. Ég hélt að það yrði bara lítið nálarsýni – en það var gerður skurður. Ég hef ekki yfir neinu að kvarta. Það sem fannst var góðkynja og það er allt í lagi með mig."
—Marcia
Til að fylgjast vel með brjóstum og ástandi þeirra er til margs konar tækni. Ekki virðist skipta máli hvort brjóst eru heilbrigð eða sýkt af krabbameini, rannsóknir reyna oftast svolítið á taugarnar. Þær eru hins vegar ómissandi liður í að:
-
Finna brjóstakrabbamein á byrjunarstigi þegar auðveldast er að lækna það.
-
Gera læknum þínum kleift að velja þá meðferð sem best er í þínu tilfelli.
-
Fylgjast með því hvort meðferð ber tilætlaðan árangur og heilsu þinni að meðferð lokinni.
Segja má að rannsóknir skiptist í tvennt. Annars vegar eru þær sem tengjast leit að brjóstakrabbameini (eins og til dæmis brjóstamyndataka á tveggja ára fresti) þar sem leitað er að merkjum um sjúkdóminn hjá einkennalausum konum; þess konar krabbameinsleit ætti að vera sjálfsagður þáttur í heilsugæslu hverrar heilbrigðrar konu. Hins vegar eru rannsóknir sem miða að því að fá nákvæma greiningu (eins og segulómun, blóðsýni, beinaskann) þegar grunur leikur á að brjóstakrabbamein sé fyrir hendi eða það hefur fundist. *Fræðslu um arfgengi brjóstakrabbameins og erfðarannsóknir má finna hér.
Í þessum hluta er fræðsla um allar þessar rannsóknir. Hægt er skoða myndir sem teknar eru með mismunandi tækni: brjóstamyndatöku, ómskoðun, segulómun og sneiðmyndatöku.
Sérfræðingar að baki kaflans um Krabbameinsleit og rannsóknir eru:
-
Susan Orel, M.D., prófessor í myndgreiningu við University of Pennsylvania Medical Center, Philadelphia, Pennsylvania.
-
Emily Conant, læknir og yfirmaður myndgreiningar brjóstasjúkdóma við University of Pennsylvania Medical Center, Philadelphia, Pennsylvania.
-
Marisa Wiess, krabbameinslæknir og sérfræðingur í geislalækningum við Thomas Jefferson University Health System, Philadelphia, Pennsylvania
Læknarnir eiga allir sæti í Ráðgefandi læknaráði breastcancer.org þar sem eru saman komnir yfir 60 sérfræðingar á mismunandi sviðum krabbameinslækninga.
*Ýmsu er öðruvísi háttað hér á landi en í Bandaríkjunum og hefur þurft að staðfæra ýmislegt í þessum hluta. Baldur F. Sigfússon, yfirlæknir röntgendeildar Krabbameinsfélags Íslands, las góðfúslega efnið yfir og kom með ábendingar þannig að upplýsingarnar væru í sem mestu samræmi við það sem tíðkast hérlendis.
*Málsgreinar merktar stjörnu er innskot þýðanda og ábyrgðarmanns
Næsta síða: Leit að brjóstakrabbameini
Síðast uppfært í febrúar 2009