Hvar eru brjóstamyndir teknar?
Hvar eru brjóstamyndir teknar?
Ummæli sjúklings:
„Þegar ég þarf sjálf að fara í brjóstamyndatöku, verð ég að fá niðurstöðurnar umsvifalaust. Ég vel leitarstöð með tilliti til þess hvaða orð fer af henni um áreiðanleika í læknisfræðilegum efnum og hversu mikið er lagt upp úr því að tilkynna um niðurstöðurnar án tafar."
—Marisa Weiss, M.D., sem sjúklingur
„Ég bíð ekki lengur. Einu sinni var ég þæg og góð og samþykkti allt. Svo eyddi ég heilli viku heima í algjörri sálarangist. Loksins varð ég nógu ákveðin til að fá það sem ég vildi. Ég fer í myndatöku og ef læknirinn segir við mig: ´Við látum þig svo vita þegar niðurstöðurnar eru komnar.' Þá segi ég: ,Nei ég vil fá þær núna. Ég hreyfi mig ekki fyrr en ég veit svarið. Ég þarf ekki að bíða eftir að skrifleg skýrsla sé tilbúin.´ Og þá skoðar hann myndirnar og segir mér niðurstöðuna."
—Linda
**Hér á landi fer brjóstamyndataka fram í Leitarstöð Krabbameinsfélags Íslands í Skógarhlíð 8 (sími 540 1919), en þar eru þrjú brjóstaröntgentæki. Starfsfólk deildarinnar ferðast með fjórða tækið milli heilsugæslustöðva úti á landi og tekur myndir í samvinnu við starfsfólk þeirra. Myndirnar eru framkallaðar og túlkaðar á röntgendeildinni af röntgenlæknum. Loks er eitt tæki á röntgendeild FSA á Akureyri þar sem starfsfólk hennar og heilsugæslunnar annast hópleit á vegum Krabbameinsfélagsins.
*Víða erlendis, t.d. í Bandaríkjunum, þurfa konur að velja sér áreiðanlega stöð þangað sem þær geta leitað til að fara í brjóstamyndatöku. Konum hérlendis er hlíft við þessu erfiða vali. Leitarstöð Krabbameinsfélags Íslands er alfarið treyst fyrir þessu hlutverki.
*Sértu stödd erlendis og þarft að fara í brjóstamyndatöku, eru ýmsar spurningar sem þú þarft að fá svarað til að ganga úr skugga um að þú sért í góðum höndum. Á breastcancer.org er konum bent á að leita til National Cancer Institute (800-4-CANCER) eða til American College of Radiology (800-227-5463) til að fá nánari upplýsingar. Hér fara á eftir nokkrar spurningar sem þá er rétt að fá svarað:
-
Hvað eru teknar margar brjóstamyndir á dag á stöðinni?
Á sumum greiningarstöðvum eru teknar alls konar röntgenmyndir og lítill hluti starfseminnar felst í að taka brjóstamyndir og lesa úr þeim. Greiningrstöð þar sem lesið er úr 15 eða fleiri brjóstamyndum á dag kann að vera áreiðanlegri en þar sem reynslan er minni. -
Verður brjóstamyndin skoðuð af fleiri en einum röntgenlækni?
Lesi fleiri en einn vanur röntgenlæknir úr myndunum – til dæmis tveir læknar sem fara yfir þær hvor í sínu lagi – má búast við að niðurstaðan verði nokkuð áreiðanleg. -
Talar röntgenlæknirinn við mig um leið og myndirnar hafa verið skoðaðar?
-
Get ég tekið myndirnar með mér strax eftir skoðun? Ef ekki, hvað líður langur tími þangað til ég fæ myndirnar í hendur eða læknir minn?
-
Sendir greiningarstöðin afrit af endanlegri skýrslu um brjóstamyndatökuna beint til mín? Verður hún send læknum mínum? (Eru einhver takmörk fyrir því hve mörgum er send skýrsla?)
-
Gildir sjúkratryggingin mín hjá viðkomandi greiningarstöð?
*Málsgreinar merktar stjörnu eru innskot þýðanda og ábyrgðarmanns.
**Þessi texti er að mestu fenginn úr fræðsluriti Krabbameinsfélags Íslands: Leit að krabbameini í brjóstum - Brjóstamyndataka
Næsta síða: Svona er lesið úr brjóstamyndum
Síðast uppfært í febrúar 2009