Sögusagnir um krabbameinslyf
Sögusagnir um krabbameinslyfjameðferð
1. Því meira sem þú færð af krabbameinslyfjum þeim mun betur reiðir þér af.
Hér á ekki við að betra sé meira en minna.
Mestu máli skiptir í lyfjameðferð við krabbameini að lyfin séu rétt sett saman, hvorki meira né minna en fyrirskipaðir skammtar segja til um. Mikilvægt er þó að fá að minnsta kosti staðlaðan skammt en það hefur enga raunverulega kosti að stækka eða fjölga skömmtum umfram það.
2. Veikist þú ekki af lyfjameðferðinni kemur hún ekki að tilætluðu gagni.
Rangt.
Hugmyndin um að enginn verði "óbarinn biskup” í krabbameinslyfjameðferð á ekki við rök að styðjast. Ekkert samband er á milli þess hve illa lyfjameðferðin fer í þig og árangurs í baráttunni við krabbameinið. Hver og einn bregst við á sinn hátt. Sumar konur verða sjaldan varar við aukaverkanir, aðrar finna fyrir þeim daglega.
3. Yngri konum verður fremur óglatt af lyfjunum en þeim sem eldri eru.
Það er rétt.
Því yngri sem þú ert þeim mun líklegra er að þú finnir fyrir ógleði af lyfjunum. Í heilanum er svæði sem sendir frá sér ógleðiboð og þau svæði rýrna með aldrinum.
4. Til þess að læknar viti hvernig þú bregst við lyfjunum þarf þér að verða verulega óglatt.
Rangt.
Það þarf engum að verða óglatt. Þú færð ógleðilyf í æð þegar þú færð fyrstu lyfjagjöfina og ógleðilyf til að taka með þér heim og nota eftir þörfum, aðallega fyrstu tvo sólarhringana á eftir.
5. Þér verður sífellt meira óglatt með hverri lyfjagjöf og eftir því sem tíminn líður verður þú þreyttari.
Bæði rétt og rangt.
Líði þér illa eftir hverja lyfjagjöf, á krabbameinslæknir þinn að geta breytt um velgjuvarnarlyf eða breytt skammtinum og öðru sem á að auðvelda þér meðferðina. Þótt þér verði óglatt eftir fyrstu lyfjagjöf þarf það ekki að þýða að þér verði líka óglatt næst eða ógleðin fari versnandi. Hins vegar er þreyta eitthvað sem safnast upp. Þér mun ekki finnast þú hafa eðlilega orku aftur fyrr en meðferðinni er að fullu lokið og einhver tími er um liðinn.
Næsta síða: Brjóstakrabbamein karla