Hvað er óhefðbundin meðferð?
Hvað er óhefðbundin meðferð?
Óhefðbundnar meðferðir er hugtak sem notað er til að lýsa meðferðum eða leiðum til bættrar heilsu sem ekki eru hluti af hefðbundinni læknisfræði (venjulegri, viðtekinni, almennri læknisfræði). Óhefðbundnar meðferðir eru notaðar til viðbótar við hefðbundnar meðferðir. Sums staðar er talað um samþættar eða heildrænar meðferðir vegna þess að unnt er að flétta óhefðbundnar meðferðir saman við hefðbundnar meðferðir og "samþætta" þær með því móti.
Hefðbundnar meðferðir byggjast á því sem hefur verið sannað að sé hættulaust og skili árangri. Þótt ýmsar rannsóknir sýni að konur sem greinst hafa með brjóstakrabbamein kunni að hafa gagn af óhefðbundnum meðferðum, er mikilvægt að gera sér grein fyrir að slíkar meðferðir þurfa yfirleitt ekki að gangast undir strangar prófanir eins og á við um hefðbundna læknisfræði.
Meðal óhefðbundinn meðferða er að finna nálastungur, jurtalækningar, nudd, stuðningshópa og jóga. Stundum eru óhefðbundnar meðferðir kallaðar heildrænar meðferðir einmitt vegna þess að þær miða að því að hafa áhrif á manneskjuna sem heild: líkamlega, tilfinningalega, andlega og félagslega.
Um fæðubótarefni og jurtir er fjallað sérstaklega í hlutanum um Næringu vegna þess að einfaldast er að fjalla um áhrif þeirra á líkamann út frá næringarfræði.
Munurinn á óhefðbundnum meðferðum samhliða hefðbundnum meðferðum og óhefðbundnum meðferðum einum og sér
Á íslensku er allt sem ekki telst til hefðbundinnar læknisfræði kallað óhefðbundið. Hinsvegar er munur á því hvort óhefðbundnar meðferðir eru notaðar SAMHLIÐA hefðbundnum læknismeðferðum eða hvort þær eru látnar koma í þeirra stað. Á ensku er talað um alternative medicine þegar óhefðbundnar meðferðir eru látnar KOMA Í STAÐ hefðbundinnar læknisfræði.
Það getur gert þér gott að bæta jóga, tai chi eða nuddi inn á meðferðarplanið þitt, en þú ættir ALDREI að skipta út viðtekinni meðferð (skurðaðgerð, krabbameinslyfjameðferð, geislameðferð, móthónameðferð) fyrir eitthvað annað. Því mælir breastcancer.org ekki með alternatívum aðferðum.
Nokkur fjöldi rannsókna hefur sýnt að rúmlega 70% þeirra sem hafa lifað það að fá brjóstakrabbamein (krabbameinskempurnar) hafa notfært sér að minnsta kosti eina óhefðbundna meðferðarleið jafnframt þeim hefðbundnu.
Í þessum hluta geturðu kynnt þér nánar eftirfarandi hliðar á óhefðbundnum meðferðum:
Næsta síða: Hvernig virka óhefðbundnar meðferðir
Síðast uppfært í ágúst 2008