Skurðmeðferð
Skurðmeðferð
Hlutverk skurðaðgerða í meðferð við brjóstakrabbameini
Ummæli læknis:
„Þetta er einungis vegartálmi á leið til betra lífs. Spurningin er aðeins hvernig hægt er að komast yfir eða framhjá tálmanum. Markmið okkar með skurðaðgerð er að reyna eftir megni að gera sjúklingnum kleift að lifa góðu lífi." —Thomas G. Frazier, M.D.
Í rúma öld hefur skurðaðgerð verið sú aðgerð sem fyrst er gripið til gegn brjóstakrabbameini. Margt hefur þó breyst á undanförnum árum og nú orðið er markmiðið að gera skurðaðgerðir svo markvissar og nákvæmar að unnt sé að varðveita sem mest af heilbrigðum brjóstvef. Brjóstnám (þegar brjóstið er allt fjarlægt) er meira að segja nærgætnari aðgerð en var fyrir mannsaldri síðan.
Með því að skoða þennan hluta ættirðu að sjá hvaða kostir eru í stöðunni og skilja hvernig ákvörðun um skurðaðgerð er háð margvíslegum þáttum sem mynda „persónuleika" krabbameinsins. Það sem mestu máli skiptir þegar ákvörðun er tekin, er á hvaða stigi krabbameinið er, hver einkenni þess eru og hvað þú ert tilbúin að gangast undir og getur verið sátt við í bráð og lengd.
Þú kannt að hafa heyrt mismunandi orð notuð til að lýsa mismunandi skurðaðgerðum en í rauninni stendur valið bara um tvennt:
-
Skurðaðgerð sem varðveitir brjóstið ( fleygskurð). Þá er einungis æxlið fjarlægt úr brjóstinu eða sá hluti brjóstsins þar sem krabbameinið hefur búið um sig. Á eftir fylgir venjulega geislameðferð á brjóstvefnum sem eftir er.
-
Skurðaðgerð sem fjarlægir brjóstið (venjulega kallað brjóstnám). Þá er allt brjóstið fjarlægt með skurðaðgerð. Stundum fylgir geislameðferð brjóstnámi.
Sé krabbameinið ífarandi (illkynja) er hugsanlegt að þessum aðgerðum sé fylgt eftir með brottnámi eitla. Einnig kann að vera mælt með því að beitt sé meðferð sem hefur áhrif á allan líkamann svo sem móthormónameðferð eða krabbameinslyfjameðferð, eða jafnvel hvoru tveggja.
Þörf fyrir meðferð sem hefur áhrif á allan líkamann er óháð því hvort farið er í fleygskurð eða brjóstnám. Þú skalt því ekki velja eða samþykkja brjóstnám í þeirri trú að þar með sleppir þú við meðferð með krabbameinslyfjum.
Sértu með brjóstakrabbamein á fyrstu stigum, skaltu spyrja lækni þinn nánar um varðeitlagreiningu sem hugsanlega getur komið í stað hefðbundins eitlanáms í holhönd. Reyndu að komast að því hvort það geti hentað í þínu tilfelli. Komi í ljós að svo er, skaltu fá að vita hvort skurðlæknirinn sem á að framkvæma aðgerðina hafi reynslu af þessari nýju tækni. Sérfræðingar í hlutanum Skurðaðgerð eru:
-
Thomas G. Frazier, M.D., sérfræðingur í almennum skurðlækningum og brjóstaskurðlækningum við Thomas Jefferson University Health System, Philadelphia, PA
-
Anne L. Rosenberg, M.D., brjóstaskurðlæknir við Thomas Jefferson University Health System, Philadelphia, PA
-
Marisa C. Weiss, M.D., krabbameinslæknir og sérfræðingur í geislalækningum við Thomas Jefferson University Health System, Philadelphia, PA
Þessir læknar eru meðlimir í Ráðgefandi læknaráði breastcancer.org þar sem eiga sæti yfir 60 sérfræðingar á sviðum tengdum brjóstakrabbameinslækningum.
Næsta síða: Sögusagnir um skurðaðgerðir vegna brjóstakrabbameins
Síðast uppfært í september 2010