Stuðningur
Stuðningur
Hér er að finna allt mögulegt sem kann að létta þér lífið meðan á meðferð stendur og eftir að henni er lokið. Listinn hér til vinstri gefur efnisflokkana til kynna, hvort sem um er að ræða tengingar við önnur vefsvæði og stofnanir eða efni sem ég hef tekið saman og tel að geti aukið þrótt, miðlað fróðleik eða veitt huggun.
Andlegur og líkamlegur styrkur kann að ráðast af viðhorfi ekkert síður en aðstæðum. Því kann að vera gott að sækjast eftir því sem veitir styrk en veikir hann ekki. Í daglegu lífi er hlátur betri en grátur þótt hollt geti verið að gráta. Ég hef viljandi sniðgengið allt átakamikið og/eða sorglegt efni af þessum sökum nema það þjóni sérstaklega þeim tilgangi að sýna andlegan styrk í þrengingum og geti þannig veitt öðrum aukinn mátt.
Þessi hluti vefjarins er íslenskur, að undanskildum köflunum Að takast á við óttann við brjóstakrabbamein og Nýjar upplýsingar og fréttir af rannsóknum sem eru sóttir á heimasíðu breastcancer.org. Víða hefur verið leitað fanga og ýmsir hafa lagt til efni. Þessi hluti er þess eðlis að sífellt má bæta við hann nýju efni og ábendingum. Hef ég komið þar fyrir ýmsu sem ella hefði farið í glatkistuna en kann að koma að góðum notum.
Vitir þú af góðu efni sem þér finnst eiga heima hér eru ábendingar þegnar með þökkum með tölvupósti á netfangið brjostakrabbamein@brjostakrabbamein.is. Einnig er hægt að fara neðst á hvaða síðu sem er og smella á Senda grein og koma ábendingum fyrir í skilaboðarammanum sem þá birtist. Farið er yfir allt ritað efni með tilliti til frágangs og hann samræmdur því sem fyrir er.
Sérstakar þakkir
ber að færa skáldum þeim og hugsuðum sem ég hef sótt til ljóð og annað uppbyggilegt efni í Máttarorð dagsins og Ljóð dagsins. Langflestir, skáld og rétthafar, hafa þegar veitt elskulegt leyfi sitt til að birta ljóð og orð. Ekki hefur þó enn tekist að ná til allra. Vonandi tekst það áður en vefsetrið verður formlega opnað hinn 10. desember, að öðrum kosti verður efni sem ekki hefur fengist leyfi fyrir að sjálfsögðu fjarlægt.
Snorri Ingimarsson, krabbameins- og geðlæknir, átti hugmyndina að því að birta ljóð á vefnum og er honum þakkað af heilum hug.