Bækur
Bækur
Betri félaga en góða bók er vart hægt að hugsa sér. Í bókum má finna svo ótal margt. Þegar þær eru á annað borð komnar í hús eru þær við hendina og bíða þess þolinmóðar að við þeim sé litið.
Leyfi heilsan ekki að þú lesir sjálf/ur, geturðu hugsanlega beðið einhvern um að lesa upphátt eða - sem ekki er síðra - að útvega þér hljóðbók. Mörg bókasöfn lána út hljóðbækur og við sérstakar aðstæður er hægt að fá lánaðar hljóðbækur hjá Blindrafélaginu. Framboð af hljóðbókum til sölu hefur aukist til mikilla muna.
Á listanum yfir lesefni hef ég viljandi sniðgengið erfiðar, átakamiklar og dapurlegar bækur hversu stórkostleg verk sem þær kunna að vera. Reynsla mín er sú að í veikindum, þegar líkamleg orka er af skornum skammti eða sálin aum, forðast ég bækur sem lýsa vonlitlum eða hrikalegum aðstæðum og sæki í næringarríkar bækur, gamansamar eða einhvers konar afþreyingu eða reyfara en læt liggja kyrrar þær sem geta truflað sálarfrið minn.
Bækur sem veita mér andlegan styrk hef ég einnig að staðaldri við höndina og les oftast eitthvað í þeim daglega. Stundum nægir að lesa stuttan kafla eða jafnvel bara fáein orð. Þannig lesefni getur þú fundið undir Máttarorð dagsins og Ljóð dagsins. Oftar en ekki hef ég líka haft þörf fyrir að fræðast um sjúkdóminn, kynna mér hugmyndir um hvernig ég get stuðlað að bættri heilsu eða á annan hátt orðið sjálfri mér að liði. Listinn ber þess merki.
Þú sem þessar línur lest, hvort sem þú hefur aðra sögu að segja eða ert sama sinnis: Munir þú eftir bók eða bókum sem þér finnst eiga heima á listanum en er þar ekki að finna og vilt deila með þér ábendingum um lesefni vertu þá svo góð/ur að senda þær á brjostakrabbamein@brjostakrabbamein.is þar sem þeim verður tekið fagnandi. Ábendingu þarf að fylgja titill, nafn höfundar og helst örstutt lýsing á efni bókar eða umsögn. Ekki er verra ef nafn útgefanda og útgáfuár fylgir með.
Í samskrá íslenskra bókasafna, Gegni, er unnt að kanna hvort ákveðin bók er til á safni og þá hvar. Einfaldast er að slá inn heilum titli í "leit" og opna síðan "safn" til að athuga á hvaða safni má finna eintak.
Á bókmenntavefnum má finna umsagnir um bækur, fréttir af útgáfum, nákvæmar og góðar upplýsingar um höfunda og margt fleira. Fyrir bókaorma er heimsókn á síðuna eins og að komast að ríkulegu hlaðborði.
Megir þú vel njóta,
Þuríður Baxter