Krabbameinsfélag Íslands og RÁÐGJAFARÞJÓNUSTAN
Krabbameinsfélag Íslands
Krabbameinsfélag Íslands var stofnað árið 1951. Þá voru aðildarfélögin þrjú en nú eru þau 30, bæði svæðafélög og stuðningshópar sjúklinga.
Á aðalfundi, sem haldinn er árlega, er kosin sjö manna stjórn. Núverandi formaður hennar er Sgríður Snæbjörnsdóttir, hjúkrunarfræðingur. Forstjóri félagsins er Ragnheiður Haraldsdóttir, hjúkrunarfræðingur.
Tilgangur félagsins er að styðja og efla í hvívetna baráttuna gegn krabbameini, svo sem með því að stuðla að þekkingu og menntun um krabbamein og krabbameinsvarnir, efla krabbameinsrannsóknir, m.a. með söfnun og vísindalegri úrvinnslu upplýsinga, beita sér fyrir leit að krabbameinum á byrjunarstigi og styðja framfarir í meðferð krabbameina og umönnun krabbameinssjúklinga.
Á heimasíðu krabbameinsfélagsins má sækja margs kyns fróðleik um félagið, starfsemi þess, aðildarfélög, styrktarhópa og margt fleira.
RÁÐGJAFARÞJÓNUSTA KRABBAMEINSFÉLAGS ÍSLANDS
RÁÐGJAFARÞJÓNUSTAN er í húsi Krabbameinsfélags Íslands að Skógarhlíð 8, fyrstu hæð. Opið kl. 9-16.30 virka daga. Auk þess eru fundir og námskeið á daginn, á kvöldin og um helgar. Sett hefur verið upp hágæða hljóð- og upptökukerfi þannig að fyrirlestrar og annað sem fram fer, verður nú AÐGENGILEGT Á NETINU.
Öll þjónusta er án endurgjalds. Sjá nánar dagskrár með því að smella hér . Dagskrá hvers mánaðar er birt undir sérstökum flipa. Þú getur látið skrá þig á lista og fengið allar upplýsingar sendar jafnóðum.
Upplýsingar og skráning á námskeið er hjá Gunnjónu Unu í síma 5401912 og á netfanginu una@krabb.is eða hjá Ragnheiði Alfreðsdóttur í síma 540 1916 og á netfanginu ragnalf@krabb.is Gjaldlaus símaráðgjöf og símsvari: 8004040
Þú átt þess kost að hitta hjúkrunarfræðing, félagsráðgjafa, fleiri fagaðila eða aðra sem hafa gengið í gegnum svipaða reynslu og þú. Boðið er upp á viðtöl, faglega ráðgjöf, sjálfshjálparhópa, námskeið, hagnýtar upplýsingar, aðgang að tölvum og prentara, heimilislegt húsnæði og hressingu.
Saga og tilgangur ráðgjafarþjónustunnar
Ráðgjafarþjónusta Krabbameinsfélags Íslands var opnuð í nóvember 2007 fyrir krabbameinssjúka og aðstandendur þeirra í húsnæði krabbameinsfélagsins. Á heimasíðu er að finna eftirfarandi orð:
„Ráðgjafarþjónustan er ætluð þér sem greinst hefur með krabbamein og aðstandendum þínum. Tilgangurinn er að vinna með þér til að þú náir jafnvægi í lífinu við þær breyttu aðstæður sem krabbameinsgreining veldur."
Síðast uppfært í september 2011