Hugleiðslu- og heilunarjóga, slökun og einfaldar æfingar eftir aðgerð á brjósti

JÓGA NIDRA: Hugleiðslu- og heilunarjóga

Jóga nidra byggist á því að beita markvissri öndun og djúpri slökun sem laðar fram innri orku og heilunarmátt líkamans.

UNDIRBÚNINGUR FYRIR HUGLEIÐSLU- OG HEILUNARJÓGA

Þú kemur þér vel fyrir í rúminu eða á dýnu á gólfinu og hefur sæng eða teppi við höndina. Svefngrímu eða klút til að leggja yfir augun er einnig gott að hafa innan seilingar.

Svefn kann að sækja að þér í byrjun og því heppilegt að þú sért vel sofin/n eða hvíld/ur til að byrja með.

Hljóðskrá með hugleiðslu- og heilunarjóga að hætti Amrit Desai sem Hildigunnur Haraldsdóttir leiðir opnast þegar þú smellir á orðið. Hugsanlega hentar þér betur að hafa hana á geisladiski fremur en inni í tölvunni. Þurfir þú aðstoð við að hlaða henni inn á geisladisk og enginn til að veita hana, er þér velkomið að hafa samband um netfangið brjostakrabbamein@brjostakrabbamein.is eða við Þuríði í síma 551 2682.

Aðrir geta haft gagn af þessari tegund jóga þótt skráin sé sett inn með þá í huga sem lasburða eru eða rúmliggjandi.

UM HLJÓÐSKRÁNA OG VISTUN HENNAR

Hljóðskráin er vistuð á .mp3 formi sem á að vera hægt að opna í flestum spilurum. Komist þú ekki inn í hljóðskrána með því að smella á undirstrikaða orðið, er unnt að vista hljóðskrána á harða diskinum og er það gert svona:

Í Mozilla Firefox vafranum (PC):

Hægri smellt á tengilinn (Hljóðskrá) og valin aðgerðin 'Save link as'. Þá opnast gluggi með skráakerfi tölvunnar og þar má velja einhverja möppu (t.d. My Documents) eða skjáborðið (Desktop). Sjálfgefið er að nafn skrárinnar er það sama og á vefnum (ThuridurBaxter) en því má breyta. Smellt á 'Save' og þá vistast skráin og 'Download' glugginn opnast. Honum má loka með því að smella á 'x' í hægra horni efst. Skrána má nú nálgast á þeim stað á tölvunni þar sem hún var vistuð.

Í Internet Explorer vafranum (PC):

Hægri smellt á tengilinn (Hljóðskrá) og valin aðgerðin 'Save target as'. Þá opnast gluggi með skráakerfi tölvunnar og þar má velja einhverja möppu (t.d. My Documents) eða skjáborðið (Desktop). Sjálfgefið er að nafn skráarinnar er það sama og á vefnum (ThuridurBaxter) en því má breyta. Smellt á 'Save' og þá vistast skráin og 'Download' glugginn opnast. Honum má loka með því að smella 'Close'. Skrána má nú nálgast á þeim stað á tölvunni þar sem hún var vistuð.

 

 

Slökun

Af örlæti sínu og hjartahlýju hefur Guðjón Bergmann, jógakennari m.m., sett inn ókeypis hljóðupptökur af slökunar-, öndunar- og hugleiðsluæfingum sem nálgast má í gegnum vefsíðu hans. Smelltu HÉR til að komast að efninu eða á fyrirsögnina. Til að opna hljóðupptökurnar þarf að hlaða niður Quicktime eða hægrismella og velja Save as og vista (t.d. á „desktop"). Þar eru þær aðgengilegastar.

Æfingar eftir aðgerð á brjósti

Eftir aðgerð er nauðsynlegt að æfa sig vel í um það bil þrjá mánuði. Eftir það er nauðsynlegt að gera 1. og 2. æfingu áfram fyrir framan spegil og fylgjast þannig vel með hreyfiferli í öxlinni. Komi herpingur í holhöndina þarftu að gera allar æfingarnar. Mikilvægt er að slaka á eftir æfingu (æfingar 4, 5 og 6). Slökun er jafn mikilvæg og hreyfing.

Mundu að hafa axlir slakar og sveifla handleggjum eðlilega þegar þú gengur.

1. Lyftu handleggjunum með beina olnboga fram og upp fyrir höfuð. Færðu handleggina rólega niður aftur. Slakaðu á.

2. Settu hendurnar aftur fyrir hnakkann og færðu olnbogana út og aftur. Færðu olnbogana síðan aftur fram og saman.

3. Settu hönd aftur fyrir bak og upp að eða í áttina að gagnstæðu herðablaði.

4. Lyftu öxlunum upp að eyrum. Láttu axlirnar síga og slakaðu á.

5. Stattu bein og dragðu herðablöðin aftur og saman. Slakaðu á.

6. Slökunaræfing: Styddu framhandlegg á stólbak eða annað í svipaðri hæð. Hallaðu þér áfram og láttu lausa handlegginn hanga slakan með litlum hreyfingum.

Heimild: Bæklingur Krabbameinsfélags Reykjavíkur í samvinnu við Samhjálp kvenna og sjúkraþjálfara Landspítalans, Landakostsspítala og Borgarspítalans, 1984. Bæklingurinn er ófáanlegur og ekki verið gerðar af honum nýjar útgáfur. Á LSH fá konur hins vegar leiðsögn um æfingar og æfingablað heim með sér.

 

 Síðast uppfært 31. ágúst 2009

 

Til baka, Senda grein, Prenta greinina